चीनले बनायो विश्वकै सबैभन्दा ठूलो कन्टेनर जहाज, लम्बाइ ४ फुटबल मैदान बराबर

May 2026

चीनले विश्वकै सबैभन्दा ठूलो मिथानोल दोहोरो इन्धन कन्टेनर जहाज पूरा गरेर समुद्री व्यापार र हरित प्रविधिमा एउटा ठूलो कदम अगाडि बढाएको छ। यो विशाल जहाज बिहीबार पूर्वी चीनको जियाङ्सु प्रान्तको नान्टोङ सहरबाट समुद्री परीक्षणका लागि प्रस्थान गरेको छ।

चिनियाँ राज्य सञ्चालित मिडिया सिन्ह्वाका अनुसार यो जहाज नान्टोङ कोस्को खाई जहाज इन्जिनियरिङ कम्पनीले निर्माण गरेको हो। हाल यसलाई विश्वको सबैभन्दा ठूलो मिथानोल दोहोरो इन्धन कन्टेनर जहाज मानिन्छ।

जहाजको लम्बाइ ३९९.९९ मिटर छ। जुन लगभग ४ फुटबल मैदानको लम्बाइ बराबर हो। यो ६१.३ मिटर चौडा र ३३.२ मिटर गहिरो छ। जहाजको डेडवेट टनेज २ लाख २५ हजार टन छ र एक पटकमा २४ हजार १६८ स्ट्यान्डर्ड कन्टेनरहरु बोक्न सक्छ। यसलाई यसको श्रेणीको सबैभन्दा ठूलो जहाज भनिन्छ।

ग्लोबल टाइम्सले कम्पनीका प्रतिनिधि झाङ हाइडोङलाई उद्धृत गर्दै भनेको छ कि जहाजको सबैभन्दा महत्वपूर्ण विशेषता यसको अत्याधुनिक मेथानोल दोहोरो–ईन्धन प्रणाली हो। यसमा विश्वको सबैभन्दा ठूलो मेथानोल दोहोरो–इन्धन मुख्य इन्जिन, सहायक इन्जिन र बोयलर प्रणाली रहेको छ। यसले जहाजलाई आवश्यकताअनुसार मेथानोल र परम्परागत इन्धनबीच निर्बाध रुपमा स्विच गर्न अनुमति दिन्छ।

विज्ञहरुका अनुसार यदि यो जहाज हरियो मेथानोलद्वारा सञ्चालित छ भने यसले वार्षिक रुपमा लगभग १ लाख ५० हजार टन कार्बन डाइअक्साइड उत्सर्जन घटाउन सक्छ। थप रुपमा सल्फर अक्साइड उत्सर्जन वस्तुतः हटाइनेछ र नाइट्रोजन अक्साइड उत्सर्जन उल्लेखनीय रुपमा घटाइनेछ। यसलाई विश्वव्यापी ढुवानी उद्योगको डिकार्बोनाइजेसन लक्ष्यहरुतर्फ एउटा प्रमुख कदम मानिन्छ।

समुद्री परीक्षणहरु पूरा भएपछि जहाजलाई अन्तर्राष्ट्रिय ढुवानी मार्गहरुमा तैनाथ गरिनेछ। चीनले दाबी गर्छ कि यसले विश्वव्यापी समुद्री उद्योगको हरियो र कम कार्बन संक्रमणलाई नयाँ गति प्रदान गर्नेछ।

यसैबीच चीनको उद्योग तथा सूचना प्रविधि मन्त्रालयको तथ्यांकअनुसार २०२६ को पहिलो त्रैमासिकमा चीन तीनवटै प्रमुख जहाज निर्माण सूचकहरुमा विश्वमा पहिलो स्थानमा छ। यस अवधिमा चीनमा १ करोड ५६ लाख डेडवेट टन जहाजहरु निर्माण सम्पन्न भएका छन्। जुन गत वर्षको तुलनामा ४६ प्रतिशतले बढी हो। –एजेन्सी